prennent. Mais c'est assez de cette matiere, reprenons un
peu nostre discours. Si bien donc, cher Gusman, que Done
Elvire ta Maistresse, surprise de nostre départ, s'est mise
en Campagne aprés nous ; et son coeur, que mon Maistre a
sceu toucher trop fortement, n'a pû vivre, dis-tu, sans le
venir chercher icy ? veux-tu qu'entre-nous je te dise ma
pensée ; j'ay peur qu'elle ne soit mal payée de son amour,
que son voyage en cette Ville produise peu de fruit, et que
vous eussiez autant gagné à ne bouger de là.

GUSMAN.
Et la raison encore, dy moy, je te prie, Sganarelle, qui
peut t'inspirer une peur d'un si mauvais augure ? ton
maistre t'a-t-il ouvert son coeur là-dessus, et t'a t'il dit qu'il
eust pour nous quelque froideur qui l'ait obligé à partir ?

SGANARELLE.
Non pas, mais, à veuë de païs, je connois à peu prés le
train des choses, et sans qu'il m'ait encore rien dit, je
gagerois presque que l'affaire va-là. Je pourrois peut-estre